TANOB IN GUYANGA

  • Whatsapp
banner 468x60

Langit totok monggolom, nongkon moyayu’ dongogon gotup takin kilat moyo-moyodudui. Ki Baay Anu’ limitu’ mako kon bingki’ rosobang dia’ mopolia liai. Limanya ano luko’ noi tudu kon pa’a ko kada kadai in Hp.

Ki’ adi’nya tua kon Jawa’ bagu noyosingognya, tonga’ de’emanbi’ pia in gina kinorasaannya, sin tonga’bi dodob beresi mo nakit bo’ sisi’ pogina’an.

“Nongonu ki Mama mokoposusahbi’ mangoi koi nami adi’?”Tua pangkoi singog I adi’nya onda noyosambung kon telepon.

“Ki’ine in mokoposusah koi monimu adi’ au’? ka’ kaminda papamu na’abi’ kon baloy kopi-kopia da’ “ Abati Baay Anu’ nokodongogmai kon singogi adi’nya dali’ nolin bulalu.

“Maksudku ki mama bo’ ki papa in angoidon kon jawa’ sin tumpaladon mogoguyang bo dia’ doman mo sehat. Ba’ aku’oidon in moki undam koi namunda I papa” Singogi adi’nya bobay bui nogabat.” Onu pabi’ in pobatahangan nion kon kota’. Kami adi’ in dia’bidon ko waktu mobui kota’ mogurus koi namunda I papa, sin totok mo anto’ in urusan nami”

“Ka’ kamindai papamu dikadon pikiron sin dia’bi’ nongonuka na’a. Aka oyu’on in waktu monimu da’ dali’ angoi tarap, tonga’ aka mo sibuk moiko da’ dia’bi’ nongonu in dia’ moi angoi” Abati Baay Anu’ mopositontol tonga’ dinianya bahasa moluko’ mo alus.

“ Ka Maksudku in angoi bidon koi nako’ dikadon mobatahang kon nion. Dega’ na’ondabi’ in moyosingogi mama ba’ mo mangarti” Ki Ina’I Anu’ mulaidon mopoponik in gina, singognya nodugang koropot.

“Da’ O’o.. ba’ moyosingogpa in kamindai papamu”

“Dika salalu mopoalasan in moyosingog, singgaipa tua abatin bai moyosingogpa, olaton mako yo’ umuranbi’ dia’in habar. Tiket in taluyon kudon yo’ ikolom baba’don mamangoi” Kai Ina’I Anu’ takin pinatoyan in hp.

Lumongow mako kon hp kon palad in limanya, ki Baay Anu’ bui nogina noropot. Dongogonmai obu I Laki Anu’ moyo moyo dudui nongkon bonuin baloy.

Andon todiminggu na’a ki adi’nya bobay tua nogaid kon jawa’ in salalu mo telepon, momakisa koi nia bo koi Laki Anu’ maya’ in jawa’ tua kon baloy koi nia. Tonga’ ta’bi salalu abatani Baay Anu’ kon o’o bain maya’ asal moyosingogpa in kaminda papamu. Sabanarnya tua dongka bidon alasan. De’emanbi’ kon doi’ maya’ mogutun kon baloi adi’, tonga’ rasa’ani Baay Anu’ onda dali’ mogutun onom nobulan kon tua taong kolabung, yo’ mo’anto’bi’ in aidi adi’nya in dia’ mokosanang kon gina.

Ondapa in karna ki’adi’nya totok mosibuk sin mo’anto’ in o’aidan kinadayan, yo’ dia’bi’ doman in kasampatani adi’nya mobogoi perhatian kon guranga. Na’aidon in lukadan bain ompigon waktu noi tu’ot kon rumah sakit, sedang dali’pa moganut mojalang takin guyanga bo dia’ doman.

No gutun kon baloy adi’ ta’ lawang-lawang tonga’ minaya’ nogogutunan. Ompu tontani’ tongkai ompu intaw ibanya, sin mosia komintabi’ noyayu’.

Kon popod in umur, Ki Baay Anu tonga’ moharap oyu’on topilik tabi bo’ perhatian in adi’ bain ompu koi nayaduai Laki Anu’, badan mulaidon mopotaki-takit, dia’don basi’ mota’aw pipiron in tompot, dia’don mota’aw moi tala’ kon koka’anon. Tonga’ ibog dongka moyaput kon sabar, sin adi’ tumpaladon mosibuk kon urusan in rumah tangga bo’ o’aidan monia tontani.

Guyanga ta’ nomiag, noposikolah sampe nobali’ adi’ baraguna, kinotombolikudan in o’aidan, buloi bo’ adi’. Mosia in dia’bidon ko waktu mogurus kon guyanga, aka guyanga motakit yo’ mosia lebe momili’ moneba kon mololukad sin o’aidan monia dia’ mota’aw tala’an. Padahal guyanga de’eman tonga’ moparalu kon doit ogoi adi’ sin paralu monia in tabi bo’ perhatian ta’ na’onda in inogoi monia tungkul tua.

Kon gina guyanga poposikola adi’ ba’ mobali’ intaw mo mangarti singgai tumi, tonga’ no batuk kon sikola umum sampe adi’ dia’ pernah pinopobalajar kon sikola agama, adi’ nopandoi tonga’ no’ilang kon pandung kon guyanga.

Pos terkait

Tinggalkan Balasan

Alamat email Anda tidak akan dipublikasikan. Ruas yang wajib ditandai *